香港人成日夜晚都掛住睇波睇劇搞到凌晨先瞓,第二日好易唔夠精神。想喺公司小睡一陣,回復精神?原來各處鄉村各例,單喺美國有啲地方有埋午睡室,但有啲地方就嚴禁午睡!

美國聯邦政府總務管理局,喺今月初發布新指令,除非得到官員授權,否則禁止任何人於聯邦大樓中瞓教。呢項指令引嚟唔少爭議,原來加州審計辦公室(California State Auditor's Office)上年曾發布過一名員工嘅報告,指出公司內有位員工每日都喺返工時間瞓教,仲長達3個鐘,估計因為佢令該州係4年內損失咗約4萬美元的生產力。

不過大家咁眼瞓原來係有原因嘅。根據波士頓布萊根婦女醫院嘅睡眠醫學研究,大約有7000萬美國人患有睡眠障礙,所以出現睡眠不足嘅問題。而睡眠不足令發生工傷事故風險更高,仲會帶嚟各種唔同嘅健康問題,如肥胖症、糖尿病、心臟病等等,最終為公司帶來更多損失。另外,有瑞士研究指出,每周午睡一至兩次,患心臟病及中風嘅機會就會減少48%。唔少專家仲覺得小睡有助紓緩疲勞,提升工作表現。

有啲公司意識到員工睡眠不足嘅問題,仲為此提供解決方法。例如美國雪糕公司 Ben & Jerry's 就為員工設立午睡室,不過休息時間限制喺20分鐘內,若因生病需要更多睡眠時間嘅員工就會被返回家。而日本,就有公司安裝隔音吊艙,鼓勵長時間工作嘅員工適時休息。

圖: Shutterstock