澳洲新南威爾斯州山火持續多時,林內逾350隻樹熊被燒死。早前有隻樹熊被困火海,有名女士見狀,就急急腳衝咗入去,仲除咗自己上衣,保護住樹熊,成功將樹熊救出火海。

呢位女士叫Toni,佢原本只喺路過,不過見到火海入面有隻樹熊,就馬上衝咗入去。當樹熊喺大火中出嚟時,消防員立刻幫佢澆水降温。但樹熊背部俾火燒傷,喺包裹住佢嘅衣物上殘留唔少血跡。樹熊其後就送去樹熊醫院,目前情況穩定,相信可以康復。

好彩有Toni,見義勇為,樹熊先可以得救。另外,澳洲呢場大火,喺10月26日開始,到目前已經蔓延至2,000公頃嘅灌木叢,甚至波及到一個樹熊繁殖地。當地樹熊保護組織估計,已有350隻樹熊喺大火中喪生。而喺未來3個月都未有可觀嘅降雨情況,所以預計山火情況仍然持續嚴峻。

圖:twitter@lizziepearl