柬埔寨吳哥窟係世界文化遺產之一,每年吸引數百萬來自世界各地嘅遊客朝聖,唔少遊客仲會選擇騎大象遊覽呢個宏偉古蹟。

不過,柬埔寨政府最近就宣佈,明年起全面禁止吳哥窟寺廟公園內嘅騎象活動。而吳哥窟園區負責人亦指園內嘅大象都年邁,不適合繼續接載遊客,並表示園內14隻大象中有5已放歸社區森林,可以過安穩嘅退休生活。

事實上,大象喺接載乘客嘅過程一直都受苦,佢哋除咗要負擔額外重量外,亦要承受長時間喺炎熱天氣下工作之苦。喺2016年就有一隻雌性大象因喺40度高溫下工作40分鐘而體力不支倒下最終死亡。

動物並非牟利工具,因此世界各地越來越多聲音呼籲推動物友善,除咗「領養代替購買」外,亦希望遊客盡量避免參與以動物表演、騎乘等作招徠嘅景點活動。

原圖:法新社