台灣動物保護團體「浪愛繼續-tnvr小隊」最近喺街頭拯救一隻浪浪,期間小黃狗不斷掙扎,就算中咗麻醉槍依然奮力向前跑,直至跑到一堆布料旁邊,終不支倒地。工作人員細睇之下,發現「布料」原來係一隻小象公仔…或者呢隻小象就係前主人唯一留低俾佢嘅物品,所以小狗至死都要守護?

工作人員估計,喺過去無數嘅流浪日子,就係呢隻公仔同小黃狗相依為命,因此小黃狗喺生命受到威脅時依然奮力「保護」,睇得出呢隻公仔對小黃狗嚟講,係佢生命嘅全部。

「浪愛繼續-tnvr小隊」將呢段經歷同小黃狗同公仔嘅「合照」上載上FACEBOOK專頁,並憾慨寫下「能有家誰想流浪」,希望有更多人支持為流浪動物結紮。而小隊其後亦更新小黃狗狀況,表示會先觀察同評估小黃狗嘅狀態再安排有心人士領養。

原圖:「浪愛繼續-tnvr小隊」Facebook

#圈新聞 #領養代替購買