今年係豬年,係結婚嘅好年,小編身邊都有唔少朋友選擇喺今年結婚。畀人情都畀到窮啊!最近ESD 生活易公布咗2019年嘅人情公價,原來去高級酒店飲嘅人情已經由2018年嘅$1200蚊加到$1400蚊啦!嘩!好貴啊!

「生活易」喺今年8月至9月期間進行調查,資料指出高級酒店人情中位數,由去年嘅 $1200蚊增至今年$1400蚊 ,增幅達 16%。而午間婚宴則由 $600蚊增至 $800蚊,上升高達33%。至於酒樓由 2017 年起,價位無變動,維持喺$800蚊。

調查亦指出結婚嘅開支愈來愈高,今年平均開支係$36.9 萬,較去年升 2%。當中最大嘅開支就係擺酒啦!不過,其實並唔係關於結婚嘅所有開支都有升幅嘅,例如「蜜月旅行」同「婚紗攝影」嘅平均消費分別錄得4%及5%嘅跌幅,為$ 3.8萬同$2.4萬 。

原圖: 電影「我要做model」截圖

#去飲 #做人情 #紅色炸彈