任食、任上網呢啲優惠時常都會見到,但任坐頭等艙大家又聽過未呢?美國航空喺1981年出現財務危機,所以推出「無限次任坐頭等艙」嘅優待機票,價格高達25萬元美金(約196萬港元),仲可以額外買多張15萬元美金(約118萬港元)嘅副票,俾另一人搭。

有位芝加哥銀行家Steve Rothstein買咗呢張優待機票,仲買埋副票。自此之後,Steve就瘋狂咁坐飛機,累積超過1萬次飛行次數,唔單止坐到回曬本仲有凸添,因為飛行1萬次至少需要2000多萬美金(約1.5億港元)。

2007年,美國航空再次陷入財務危機,經調查後發現Steve每年飛咗至少價值100萬美金嘅機票,佢仲試過帶陌生人搭飛機後收返人哋機票錢。美國航空公司喺2008年以此為理由,強制終止佢嘅優待機票。

航空公司做法令Steve非常不滿,於是告上美國聯邦地區法院,但當時航空公司已經申請破產保護,而且Steve已經得到超過當初25萬購買機票10倍以上嘅價值,直到2012年雙方庭外和解,事情最後圓滿落幕。

圖: nypost