三文魚唔單止香港人鍾意食,仲係灰熊嘅主要食糧,但由於全球氣候變化,致使加拿大卑詩省嘅三文魚數量大減,令當地嘅灰熊缺乏足夠食物,變得骨瘦如柴,小編睇到都覺得佢哋可憐。

近日加拿大攝影師喺卑詩省影到一張令人心痛嘅相,相入面係一隻骨瘦如柴嘅灰熊媽媽同兩隻熊仔周圍搵嘢食嘅情景。當地漁民表示,近年來三文魚數量一直短缺,今年更加係「50年來最糟的三文魚季節」,住喺卑詩省嘅灰熊好有可能因為無足夠嘅食物過冬而遷徙去其他地方。

有見及此,當地嘅漁業協會捐贈咗500條三文魚,並喺溫哥華島嘅海岸線度投放,希望為灰熊提供食物。至於三文魚銳減嘅原因,主要係加拿大氣候變暖導致水溫上升,嚴重影響咗三文魚嘅生態系統。另外養殖三文魚亦會導致野生三文魚數量下降,因為養殖場會將廢物排出海中,引起水污染。

圖:Rolf Hicker Photography@fb