打工仔最想嘅梗係入到間好公司、遇到個好老闆,仲有超好嘅員工福利喇!日本好多公司為咗挽留人才,亦推出好吸引嘅福利、獎勵嚟降低離職率。

日本有調查發現,唔少公司推出超筍福利嚟吸引員工應聘、繼續留低,包括提供等員工免費食到飽嘅24 小時豪華餐廳、俾員工自由安排返班時間等。不過有公司更加特別,實行「早返有獎金」制度,即係如果正常返班時間係 9 點,咁8 點前返到有 500 円、7 點前返到就有 1000円獎勵,仲要係每日都可以攞!而且早返嘅時間係可以做自己嘢,而唔係做公事。

另一間公司就會提供以「年」計嘅育嬰假期,員工照顧小朋友嘅假期最長可以請6年,期間可以復職,重點係呢個育嬰期係有薪嘅!對於有小朋友嘅員工嚟講,簡直係恩典喇~唔知香港嘅公司幾時會有啲咁好嘅福利呢? 

圖:beimeilong,Gwinnett Newton Rockdale Health Departments