唔好以為打機只係後生仔嘅娛樂呀,老人家一樣鍾意!日本有位89歲嘅婆婆好鍾意打機,打足38年機兼喺YouTube開埋直播,仲話自己長壽嘅秘訣係靠打機添。

婆婆由1981年開始打機,卡帶遊戲機、任天堂紅白機經典遊戲、近年嘅PC同PS遊戲等通通都有玩過,佢仲經常喺YouTube直播打機實況,好潮呀~婆婆嘅反應雖然唔及年輕人快,但開槍射擊勝在夠淡定、熟練,不過佢話自己只係適合玩單機遊戲,因為唔會拖累其他年輕隊友咁話。講到自己長壽健康嘅秘訣,婆婆話就係靠打機!因為打機可以保持頭腦年輕,防止患上認知障礙,唔似其他嗜好例如運動咁有年紀限制,仲話打機係老咗都一樣可以做嘅嗜好添。

圖:gamespark,YT@Gamer Grandma