講起旅行,好多人都好鍾意,有無諗過旅行都可以賺錢?英國有對夫婦就做到喇,佢哋成立嘅線上旅行社,主要業務係幫30至40歲嘅單身人士規劃旅遊行程,盤生意仲迅速成為當地發展速度最快嘅初創企業之一。

Vyas細細個就超鍾意旅行,但佢好快留意到現時嘅旅遊市場一係針對年輕嘅窮遊背包客,一係就係為退休人士而設嘅高端休閑遊,就係無專為30-40歲收入穩定嘅單身貴族而設嘅旅遊團,於是萌生創業諗頭,將呢啲單身旅客集結,為佢哋度身打造旅遊路線。後嚟Vyas識咗同樣鍾意旅行嘅攝影記者Thompson,兩人一拍即合,成立旅行社Flash Pack。早期旅行社嘅生意慘淡,直至Thompson爬上巴西里約熱內盧基督像頭頂度自拍嘅相一出,隨即爆紅,連帶Flash Pack嘅關注度亦上升。

Vyas同Thompson為咗plan旅遊路線,不斷去世界各地旅遊,發掘唔同地方嘅特色景點,可以話係邊旅行邊賺錢。宜家兩人仲開花結果,有埋小朋友添~

圖:Flash Pack