仲讀緊高中嘅你又做緊咩呢?呢位嚟自美國嘅大學生,Alex Balfanz,喺佢仲讀緊高中嘅時候,佢同朋友喺網絡遊戲創建平台Roblox佈咗一款名為「Jailbreak」(越獄)遊戲。「Jailbreak勁受歡迎,目前為止有數以千萬人玩過,仲為Alex帶嚟7位數字美金收入。

Alex9歲開始就學習編寫電腦程式碼,喺2016年曾經推出賽車遊戲VOLT,至今有近900萬次遊玩記錄。而喺2016年底,Alex同朋友開始創作「Jailbreak」,每日放學返屋企就埋首開發,前前後後用咗4個月。

Jailbreak」遊戲可以俾玩家選擇扮警察或囚犯,警察工作就喺捕捉犯人,而囚犯要逃獄,趣味性相當高。而喺「Jailbreak」發佈當日,就吸引咗6萬玩家,短短幾個月內,仲為Alex帶嚟30萬美元(約235萬港元)。目前讀緊大學嘅Alex仲話,呢筆收入可以幫佢支付4年大學學費。

Alex仲話以Tesla行政總裁馬斯克(Elon Musk)為目標,「希望發掘新事物,成為具創新精神的企業家。」

圖:twitter@badccvoidroblox