人人都有自己獨特嘅簽名,通常簽嘅不外乎係英文或中文名,但美國有個網友就零舍與眾不同,竟然係畫三個貓貓頭!而呢個咁特別嘅簽名雖然辨識度高,不過就搞到近排決定買樓嘅佢食盡苦頭,被逼喺30幾份文件度狂畫貓貓,今次真係自己挖個陷阱俾自己踩~

呢位網友喺2015年申請駕駛執照嘅時候,一時興起喺簽名欄度即興畫咗3個貓貓頭,最搞笑嘅係,睇住佢畫貓嘅職員又唔阻止佢,令呢3隻貓貓頭簽名變成佢嘅正式簽名。點知過咗幾年就出事喇,皆因呢個網友最近決定買樓,之後發現有成30幾份文件需要簽名先會生效。無辦法,位網友唯有瘋狂畫貓貓,最終畫咗成百個貓貓頭先完成手續。佢事後喺網上分享呢個經歷,惹嚟唔少網民嘲笑,今次真係玩大咗啲喎。

圖:Reddit@bradimal