平時大家行山、跑步嗰陣,會唔會覺得有啲吃力?呢條哈佛大學最新發布嘅「機械人短褲」就幫到手喇,佢借助機械外力,幫人類更加輕易咁行山、跑步,而且將來仲有望幫到軍人、救援人員甚至殘障人士,等佢哋可以行得更快更遠添。

「機械人短褲」嘅腰部位置有摩打,利用電力驅動短褲上面嘅電纜,為大腿同臀部提供額外動力。著住「機械人短褲」行路,所消耗嘅氧氣比平時少,即係話所花嘅氣力亦比較少。而感覺上,著上呢個裝備行路嗰陣會覺得大概輕咗16磅,跑步就會覺得輕咗12磅。不過,呢條機械人短褲仲有待改良,例如佢需要變得更輕,電池續航能力亦不足以應付長途跋涉。响將來,呢條短褲經過改良之後,相信可以幫到殘障人士,令佢哋好似正常人咁行路。

圖:Wyss Institute at Harvard University