有咩會令你「的起心肝」減肥?其中一個原因肯定係同健康有關。英國31歲男子George Middleton讀Law出身,喺香港肯定有好多人羨慕,不過佢後嚟暴飲暴食,搞到自己成為433磅嘅肥仔,唔單止唔敢出街,仲患上糖尿病添。為咗保住命仔,佢努力控制體重,變身成210磅嘅型男。呢份勇於改變的態度,絕對值得大家學習~

George大學畢業讀完法律系後,面對茫茫前路,佢居然靠暴飲暴食嚟抒發情緒。食量有幾誇?一日狂飲4公升可樂;一次過食24包零食;响快餐店一次過鯨吞足三兩、芝士漢堡、雙層芝士漢堡、薯條、奶昔,再加兩個蘋果批。咁搞法,佢一日攝取嘅卡路里足足係同齡人建議嘅5倍,小編真係聽到都覺得飽。

飲食失衡嘅後果好嚴重,有次醫生為George檢查,發現佢患上二型糖尿病,甚至有截肢風險,醫生問佢,仲想唔想要對腳?為咗健康著想,佢立志減肥,過往零食唔離手嘅佢,開始食蔬果、番薯、粥、魚類等。除咗健康飲食,George亦明白到運動嘅重要性,佢堅持每日行路2粒鐘,幫助燃燒脂肪。

經過2年嘅健康生活模式,George減到大約210磅,差唔多得返當初體重嘅一半重量。唔單止體重,連心態都輕鬆埋,「重生」嘅佢再次投入社交生活,無幾耐就識到個女朋友,令唔少人羨慕。佢依家經常會去唔同地方演說,鼓勵其他有同樣經歷嘅人,仲讀緊私人教練課程,幫自己之餘亦希望幫埋其他人。

圖:網絡圖片