電視廣告周不時都會呼籲健康人士要定期捐血,幫到人又幫到自己。雖然廣告賣唔少,但血液嘅存庫量依然不足,尤其係稀有血型人士或者遇上大型災難嘅時候,血液就更加供不應求。有見及此,日本防衛醫科大學嘅研究團體就研發出一種適合唔同血型嘅人造血,可以有較長嘅保質期,又可以大大提高病人嘅存活率。

日本研究團體近期喺美國學術期刊發表論文話,佢哋已經成功研發出一種由人造血小板同红血球組成嘅人造血,同人類血液一樣具有止血同運輸氧氣嘅功能,仲可以喺常溫狀態下保存一年以上。研究人員試過為10隻大量出血嘅實驗兔輸入人造血,其中6隻實驗兔嘅體內產生咗同本身血液相同嘅效果,同時亦無引發血液凝固等副作用。如果人造血可以廣泛應用,將會有更多病患者得到及時治療,拯救更多人嘅生命。

圖:網上圖片