正所謂「食飽眠一眠, 快活過神仙」,午睡好處多多,對於打工仔嚟講,食完lunch若果有時間瞓個午覺,下晝做嘢都醒神啲。不過就算有時間,打工仔都未必有個安靜舒適嘅環境瞓個晏覺。為咗滿足大家嘅重要需求,有日本公司就睇中呢個「午睡市場」,推出「午睡補眠」服務,將貨Van改裝成一人睡房,等打工仔可以有個舒服嘅地方短暫休息一番。

咪睇小呢個迷你睡房,佢一啲都唔hea,入面嘅床墊係結合低彈性同高彈性材料嘅雙層結構,符合人體工學,令人瞓得舒適。車廂内仲提供飲品、降噪耳機同毛巾等用品,務求令打工仔享受到一個15至20分鐘嘅午睡時間,叉叉電再開工。不過,宜家呢個「午睡補眠」服務只向部分企業免費試用,到9月22號先會開放俾公眾體驗。

圖:網上圖片