水係人類嘅生命之源,喺乾旱地區,水源尤其缺乏,點算好?美國一間大學嘅研究團隊設計咗一個沙漠專用嘅新型集水器,特點係可以好似海綿咁吸收空氣入面嘅水分,繼而提供飲用水。

呢個集水器外表睇落似係一個四方形嘅金屬箱,其實佢係採用咗多孔隙特性嘅金屬有機框架材料(Metal-Organic Framework,簡稱MOF)製成,集水器會喺夜晚好似海綿咁吸收空氣中嘅水分,到咗日頭,就算空氣濕度下跌,但經過日照加熱後水分亦會被釋放出嚟,收集喺容器入面。

呢種以貴金屬鋯製成嘅 MOF-801集水器,每公斤MOF-801可以吸收到200 ml水。即係話用越多嘅MOF-801,就可以「變」出越多水。不過,由於鋯金屬價格較高,難以廣泛應用。所以,團隊就開發咗一種叫做MOF-303嘅新物料,希望可以用較低成本嚟增加吸收嘅水分。利用新物料製造嘅集水器將會喺環境更惡劣嘅Death Valley做試驗,如果成功嘅話,日後就有望可以解決沙漠地區嘅食水問題。

圖:YouTube@UC Berkeley