歌仔都有得唱:「世上只有媽媽好」,唔單止人類嘅媽媽愛錫仔女,動物嘅母愛一樣偉大!雲南有隻大象媽媽,將自己患病嘅小象bb送去村民屋企,以尋求人類救助,非常醒目同有靈性。

嗰隻啱啱出世2星期嘅小象患有臍帶感染同心律不正等病症,已經病到奄奄一息,大象媽媽於是將佢帶去附近村落嘅村民屋企,希望人類可以幫手,救救象bb。村民發現病咗嘅小象之後,即刻通報救助中心,由職員帶走小象治療。宜家小象已經被雲南西雙版納一間大象繁育中心收留,接受救治。

圖:網上圖片