就嚟到中秋喇,每逢中秋,唔少人都會買定月餅送俾親友,但原嚟有調查訪問發現,有成55%嘅受訪者係唔鍾意收月餅㗎!而有環保團體更發現,上年被丟棄嘅月餅多過前年成倍!

綠色力量舊年喺尖沙咀、荃灣、中環做過街頭訪問,調查市民購買月餅同過節消費習慣等。調查指出,有40%受訪者會因為「過期」而丟月餅,35%因「味道不佳」而丟棄,更有大概55%受訪者唔鍾意收到月餅。綠色力量更發現舊年遺棄嘅月餅數目比前年上升近一倍,估計有成193萬個咁多!而月餅過度包裝亦造成增加塑膠垃圾。

除咗月餅,熒光棒都係中秋出現頻率好高嘅「主角」之一,舊年使用同丟棄螢光棒嘅數量亦創新高,超過4430萬支。綠色力量保育經理表示,市民應該儘早留意月餅嘅食用期限,儘快享用、轉贈他人,或者用其他方式代替贈送月餅以減少浪費。佢仲建議市民用電子燈籠代替螢光棒,減少污染環境。

圖:網上圖片