出街食好嘢,唔少人慣咗要先用手機影相、打卡一輪先開始品嚐美食,呢個「相機食先」嘅習慣已經成為好多人生活中嘅一部分。但日本阪神甲子園球場一間叫做大力食堂嘅店主藤坂悅夫就非常唔妥呢個習慣,認為「相機食先」會令顧客錯失食物嘅最佳享用時間,佢更為咗抵制「相機食先」,不惜停售店內嘅鎮店之寶——大炸豬扒飯。

大炸豬扒飯係大力食堂開店52年嘅鎮店之寶,有6碗飯嘅大份量、豬扒足料,仲要只賣800円(約60蚊港幣),夠幾個女仔一齊share。不過亦都因為咁,大炸豬扒飯吸引唔少人去打卡影相,藤坂好嬲,見到好多人為咗影相呃like,浪費咗大炸豬扒飯。加上自己已經 81歲,再難處理大量洗米同長期站立嘅煮食工序,於是經過一番思量後,決定停售大炸豬扒飯,就算有客人保證唔會浪費食物,亦都無辦法令藤坂回心轉意。

大家以後都食唔到平靚又大份嘅大炸豬扒飯喇,亦都係時候等大家重新反思一個問題:去食好嘢,係真係去食個味道定抑或純粹為咗打卡呢?

圖:網上圖片

#美食圈 #大力食堂