塑膠難以分解,對環境危害好大,近年嚟越嚟越多地方同機構都禁止使用一次性塑膠製品,以減低對環境嘅傷害。而喺尼泊爾邊境嘅珠穆朗瑪峰,多次被媒體揭發旅客登山後留低大量不可分解嘅垃圾,當地政府於是宣佈由2020年1月1號開始,全面禁止使用厚度喺30微米或以下嘅塑膠製品、樽裝飲品。

珠穆朗瑪峰每年吸引成千上萬嘅登山愛好者前嚟挑戰,呢啲登山者攻頂之後竟遺留咗5000kg垃圾同8000kg排洩物喺山上。今年尼泊爾政府就喺珠峰收集咗超過10噸垃圾,其中不可分解垃圾佔嘅比例相當高,情況非常嚴重。當地政府恐怕長此下去會引發生態災難,於是規定由2020年起,遊客同居民都唔可以使用厚度喺30微米或以下嘅一次性膠樽、膠袋,政府亦會向居民提供5種符合規定嘅膠袋。同時,政府仲鼓勵大家轉飲金屬罐裝飲品,以代替樽裝飲品。

圖:網上圖片