結婚係人生大事,梗係希望最親嘅屋企人喺身邊一齊見證喇!可惜美國有位102歲嘅婆婆因為無辦法搭飛機,參加唔到孫女嘅婚禮,不過好在孫女有心,專程帶埋婚紗飛去嫲嫲身邊,同老人家影相,一圓心願。影相27日之後,嫲嫲安詳離世,令嗰次成為兩嫲孫嘅最後合照。

準新娘Tara同嫲嫲嘅感情好好,但自從佢哋一家搬咗屋之後,嫲嫲就要搭飛機先可以探孫女。臨近婚禮,接受臨終關懷嘅嫲嫲想去參加孫女婚禮,點知就被護士告知自己嘅身體情況唔適合搭飛機。乖孫Tara唔想嫲嫲有遺憾,一於帶埋婚紗、攝影師飛去俾嫲嫲一個surprise,提前影婚紗相。兩人都知呢次好大機會係最後一次見面,相當珍惜。雖然嫲嫲最後無緣見證婚禮,但就可以同著住婚紗嘅Tara留低合照,總算心願達成。

圖:Tara Foley@FB