相信大家都有啲細細個就相識嘅朋友,可能依家各奔前程,彼此少咗聯絡,但總會懷念嗰份小朋友之間嘅真摰友誼。美國6歲男童Jeffrey患上腦癱,行起路上嚟好困難,去到水上樂園只可以做「觀眾」,睇其他小朋友玩。但之後兩位好朋友拖住Jeffrey嘅手,互相扶持,三個人一齊玩,場面溫馨感人。

Jeffrey嘅兩位好朋友分別係5歲女仔Raya、6歲男仔Kane,三個人係足球隊隊友。當時成隊人都响水上樂園玩,但Jeffrey行動不便,只好由媽媽陪住,有得睇無得玩。呢個時候,Raya主動行埋嚟拖住Jeffrey嘅手,Kane見到後亦上前拖住Jeffrey嘅另一隻手,之後Raya同Kane傍住好友一齊去玩水上滑梯,期間即使Jeffrey行得比較慢,但Raya同Kane並無撇低好友走咗去,而係一直陪伴。

Jeffrey嘅姐姐將呢個令人感動嘅畫面拍低並放上網分享,仲大讚Raya同Kane對弟弟不離不棄,相信咁善良嘅小朋友長大後都會係好人。呢條片吸引超過760萬人次觀看,好多網友都受感動並轉發影片。Jeffrey媽媽就表示好窩心,話即使自己唔响仔仔身邊,仔仔都會得到好朋友幫助,感到好安心。

圖:Twitter@Mikaila_ryan、網絡圖片