一對恩愛夫婦,其中一方因為意外而喪失關於伴侶嘅記憶,後嚟再次愛上對方……呢啲情節响電影、電視劇就做得多,但估唔到現實世界都有發生。加拿大女子Laura於2016年同丈夫Brayden結婚,之後有次被條冧落嚟嘅柱撃傷腦部,醒返後記憶停留响17歲,完全唔認得丈夫,無曬兩個人相戀、結婚嘅回憶。但Brayden對Laura不離不棄,最後成功重燃愛火,令Laura接受男方第二次求婚。

Laura話自己醒返後嘅兩年嚟,除咗要學返點樣正常閱讀、寫作同說話,仲要面對已經嫁畀一個「陌生人」嘅情況,而自己好難投入呢段「突如其來」嘅婚姻。當時Laura好希望突然有一日會恢復所有記憶,可以同Brayden正常咁過日子,可惜事與願違。

既然一時三刻恢復唔到記憶,Laura決定畀自己同Brayden一次機會重新開始。兩個人從朋友做起,Laura了解到眼前嘅男人體貼、有耐心、有啲傻同怪,自己慢慢鐘意返Brayden,二人再次發展為情侶。到今年8月,Brayden第二次向Laura求婚並得到女方答應。Laura响社交媒體貼文宣布喜訊,表示自己雖然搵唔返過去嘅感情,但依家有一段新嘅感情同回憶。眼見有情人再成眷屬,好多網友大為感動,有近10萬人畀like恭喜,亦有唔少人留言送上祝福。

圖:Facebook@Laura Hart Faganello