喺生日、結婚等人生既重要又開心嘅時刻,當然唔少得食返個蛋糕賀一賀佢。美國有對响1970年結婚嘅夫婦都有食結婚蛋糕,不過佢哋個蛋糕竟然食到依家,係足足49年!完全打破大家對事物保鮮嘅認知,究竟發生乜嘢事?

呢對夫婦今年都已經70幾歲,後生時因為响同一間學校教書而相識相戀。七十年代結婚嗰陣,女方嘅媽媽將結婚蛋糕嘅頂部keep起,用雪櫃冷藏。之後夫婦二人每逢結婚紀念日都會拎嚿蛋糕出嚟,食少少慶祝吓,即使佢哋搬過5次屋,但呢個「傳統」從來無中斷過。

不過嚿蛋糕擺咗近半個世紀,唔會食壞人咩?「蛋糕先生」表示兩公婆食咗咁多年都無事,但蛋糕嘅口感的確變差咗。雖然蛋糕美味不再,但「蛋糕太太」認為每年食蛋糕係件有趣而浪漫嘅事,兩公婆諗住出年用蛋糕嘅碎屑混合其他材料,整返個新蛋糕,慶祝結婚50週年,同子孫分享喜悅。

圖:New York Post