仲有一兩日就開學喇!各位同學準備好未呢?一諗到每日要溫書就好頭痕?唔使咁灰,不如睇吓英國16歲學生Ruby Granger嘅溫書片段,話唔定令你有返曬動力。Ruby响自家YouTube頻道「Ruby Granger」上載咗好多展示自己溫習情況嘅影片,其中一條講一日溫書14個鐘嘅片,更吸引約230萬人次觀看,認真巴閉!

最近YouTube上興起「Studytube」熱潮,好多學生會拍片分享溫書情況、學習心得等。Ruby條片就係畀大家睇吓一日嘅溫書安排,佢6點半起身同梳洗後,先用10分鐘時間制定當日嘅學習計劃,之後做數學、化學、英文同哲學科嘅練習/功課,再食個10分鐘嘅早餐抖一抖。

休息過後,Ruby寫哲學科嘅筆記、製作關於哲學家亞里士多德嘅學習卡片,跟住溫習英文直到午膳時間。填飽肚仔,Ruby會學西班牙文、做哲學同英文科嘅功課、睇教學影片同學習卡,最後完成埋倫理學嘅論文。Ruby將溫習事項安排得比較密,除咗中間醫吓肚、執吓嘢,其餘時間幾乎都係學習,而過程中會計時,確保準時完成任務。雖然睇落好chur,但做到用最少時間做最多嘅嘢,有適當休息同時保持到效率。

呢條片好受歡迎,而Ruby嘅YouTube頻道亦吸引超過36萬人訂閱,响「Studytube」熱潮中成為數一數二嘅紅人。有對「Studytube」感興趣嘅粉絲表示,睇呢類溫書影片好似有人陪自己溫書,激發出更多動力去溫習,有助應對考試。

圖:YouTube@Ruby Granger、Emojipedia