食得唔好嘥,食飯有餸食剩咗,通常會用保鮮紙包返碟餸,下餐再食。不過傳統保鮮紙本身由塑膠同其他化學物質製成,難以自然分解,加上係用完即棄,並唔環保。有見及此,本地有環保用品公司推出可以重複使用及自然分解嘅蜂蠟保鮮布,等大家惜食嘅同時,又可以減少製造垃圾,一舉兩得~

蜂蠟保鮮布嘅製作材料包括棉布、荷荷芭油、天然蜂蠟同樹脂,荷荷芭油同蜂蠟可以抗菌防霉,樹脂就令塊布更加柔軟。保鮮布防水得嚟又夠透氣,但就唔可以包太過熱嘅食物,避免蜂蠟融化,而肉類同油膩食物都唔包得。由於保鮮布防水,將佢摺成袋仔或杯,用嚟裝蔬果或飲品等都好合適,甚至裝餐具都得!咁樣大家就可以用少啲膠器皿、膠餐具,齊齊為環保出力!

圖:BEESWAX CLOTH HONG KONG