自閉症小朋友通常比較內向,唔多鍾意講嘢,但各有天賦、潛能,發揮之後就如閃亮嘅星星,成為大家欣賞嘅焦點。內地8歲男童孫楚洋患有輕度自閉症,但响瑜伽方面好有天份,6歲就考獲專業瑜伽導師牌,成為內地最年輕瑜伽導師,仲擁有過百個學生,名利雙收。

由於父母忙於工作,洋仔兩歲嗰陣由老師全日照顧,當時父母同老師就察覺洋仔有啲內向,成日都係自己一個人玩,埋唔到其他小朋友堆。之後媽媽細心觀察,見仔仔唔鍾意講嘢,又驚同陌生人接觸,於是帶仔仔去睇醫生,結果確診輕度自閉症。為咗幫仔仔釋放身心,玩開瑜伽嘅媽媽帶埋3歲嘅洋仔上親子瑜伽堂。洋仔嘅瑜伽天賦就係响呢個時候發揮出嚟,佢上完一堂就記得曬全部動作,返到屋企仲可以一個不漏咁向媽媽展示,認真犀利!

洋仔之後繼續同媽媽練瑜伽,學咗兩年後唔只技巧進步,性格亦變得開朗,仲開始應當地瑜伽中心邀請,協助其他小朋友學習,佢到咗6歲更成為專業瑜伽導師。唔好睇洋仔年紀細細,佢上堂嗰陣都好pro,會認真示範動作、清晰講解技巧,見到學生做得唔啱,仲會親自幫手矯正添~洋仔已經教過百幾個學生,賺到超過十萬人民幣(約11萬港元)之餘,又上電視表演、接拍廣告等,認真威水!見仔仔咁有成就,媽媽好欣慰咁表示,希望仔仔從瑜伽中得到快樂,而仔仔得以盡情發揮天賦,就係做媽媽嘅最幸福收穫。

圖:微博、網絡圖片