再鋒利嘅刀都有生鏽嘅一日?世事無絕對!只要keep住心入面嗰團火,無論年紀大小都可以繼續挑戰自我。韓國舉行嘅第18屆世界游泳大師賽响上星期圓滿閉幕,期間來自日本、93歲嘅Toshiko Amano婆婆即使行動不便,亦都參加呢次賽事,雖然無贏得任何獎牌,但就收獲全場觀眾嘅喝采同掌聲。

世界游泳大師賽對於選手年齡並無設上限,25歲以上就可以參加。選手依年齡分組出賽,每5歲劃分為一個組別。Toshiko Amano婆婆係今屆最年長參賽者,100米自由泳女子90-94歲組別雖然得佢一個參加,但大會安排兩位89歲同85歲嘅選手,等三位齊齊游。

由於Amano婆婆行動唔多方便,需要由其他人扶去線道。比賽開始後,婆婆即使游得唔快,被兩位選手陸續爬頭,但始終唔放棄,响救生員全程守護同全場觀眾打氣下,努力向終點進發。當婆婆觸池一刻,場內響起熱烈嘅歡呼聲同掌聲,向佢嘅毅力致意,場面既熱血又感動。

婆婆本身好鍾意游水,曾經多次參加游泳大師賽,最早嘅紀錄顯示佢响1990年就開始參賽,先後出戰100、200、400同800米自由泳。婆婆從未攞過任何獎牌,但佢一啲都唔介意,即使坐住輪椅亦一直堅持參賽,樂在其中。對於順利完成比賽,婆婆好開心咁話:「我一啲都唔覺得攰,我要一路游水游到100歲!」婆婆,加油呀!

圖:FINA、Emojipedia