「究竟有咩動力,驅使你喺呢個暴雨下工作呀?係愛呀?定係責任?」對於呢條問題,可能好多巴絲打都會大大聲答另一個答案。不過如果畀以下呢位姓陳嘅台灣郵差去答,相信答案會係「責任」。

早前台灣台中連續幾日落暴雨,多處地方水浸,郵差陳生有次揸電單車送信嗰陣,唔小心連人帶車跌咗落被雨水淹浸嘅農田,電單車極速沒頂,最後郵差排除萬難自己爬返上馬路,十分狼狽。個人無事喇,但陳生醒起車上啲郵件仲浸响水入面,於是唔理水位已經去到心口,先後將一箱郵件同兩大袋信件搬到附近無水浸嘅民居,之後再同熱心民眾同警察拖返部電單車上嚟。

變成「落湯雞」嘅陳生返到郵局後,第一樣做嘅唔係吹乾自己,而係吹乾信件。佢同其他郵差同事用咗約兩粒鐘成功「拯救」將近200封郵件,但有部分因為濕得滯而爛咗,救唔返。第二日朝早依然落雨,不過陳生繼續送信以完成使命,佢將浸過水嘅信送到收件人手上並致歉。民眾都紛紛表示理解,無責怪陳生,更加大讚佢責任感爆燈,郵局方面亦表示會嘉許佢添~

圖:網絡圖片