肥豬肉令唔少人望而生畏,厚厚嘅肥膏更被認為對健康無益。不過近日英國廣播公司(BBC)為肥豬肉「平反」,佢哋引用外國研究選出「十大最有營養食物」,其中肥豬肉竟然排第八,名次比甜菜葉仲要高!咁係咪表示以後可以盡情食肥豬肉?當然唔係喇,食得多都會出事㗎。

根據BBC報道,肥豬肉能夠响超過1000種受評估食材中「脫穎而出」,係因為肥豬肉含有不飽和脂肪、豐富維他命B同礦物質,而不飽和脂肪有助減少身體入面唔好嘅膽固醇,降低患心血管疾病嘅風險。不過要留意嘅係,肥豬肉亦含有唔健康嘅飽和脂肪,會增加唔好嘅膽固醇,令患心血管病嘅風險上升。咁到底食肥豬肉有無益?好亂呀!

世界衛生組織建議,一般人每日正常脂肪攝取量介乎33至67克,其中飽和脂肪去到22.2克就頂曬籠。假設食4片豬頸肉,就已經食咗將近28克脂肪落肚,當中包括10克飽和脂肪,分別接近攝取量上限嘅一半!雖然食肥豬肉可以吸收健康嘅不飽和脂肪同維他命B,但同時會攝取無益嘅飽和脂肪。所以話,食還食,千祈唔好食過量呀~

圖:網絡圖片