近年市面推出唔少以甘蔗渣、粟米、小麥等作為製作原料嘅飲管,希望取代傳統塑膠飲管,只不過呢類型飲管多多少少都有加入塑料或其他物質,始終唔算係純天然。為咗令客人方便之餘又響應「走塑」,菲律賓一間咖啡店就提供以椰子葉製造嘅「Lukay」飲管,用料純天然、可百分百分解,夠曬環保!

呢間叫Cafe Editha嘅咖啡店位於Siarga島上,經理Sarah話之所以會用椰子葉整飲管,係有次同屋企人去小島旅行,見當地賣椰子水嘅小販將椰子葉捲起作飲管畀客人用。當時Sarah就覺得呢隻飲管好環保,於是學識製作方法,並引進咖啡店使用。

由於整Lukay飲管嘅材料只有椰子葉,而且製作工序簡單,Sarah每朝都會同員工一齊整飲管,平均每支唔使兩分鐘就搞掂,而客人都對呢款環保飲管好受落,仲讚咖啡店有創意添~

圖:Facebook@Cafe Editha