夏日天口㷫,歎返支冰凍汽水認真梳乎,小編有啲朋友直頭話想時時刻刻都飲汽水,不過小編即刻勸佢哋咪亂嚟,事關咁樣做係攞命仔嚟較飛!近日內地有個姓王嘅打工仔日日汽水當水飲,搞到患上「高血糖高滲綜合症」,最後因病情太嚴重而逝世。

30歲嘅王先生入院前嗰排已經覺得成日周身無力、容易口乾,去廁所去得密咗,不過佢以為係中暑,抖吓就無嘢,所以無即刻去睇醫生,仲要一口乾就飲汽水解渴。後嚟王先生身體情況唔單止無好轉,症狀仲越嚟越嚴重,終於被朋友送去醫院睇醫生。

醫生檢查後發現,王先生血糖指數達到110mmol/L,比正常指數3至6mmol/L高出差唔多成20倍,同時有酸中毒、高血鉀電解質紊亂等情況。雖然醫生全力搶救,但王先生病情實在太嚴重,最後都救唔返。

醫生表示「高血糖高滲綜合症」屬糖尿病其中一類,王先生一直都唔知自己患糖尿病,仲繼續飲汽水而唔節制,令身體因攝取水份不足而出現嚴重脫水,加劇病情。醫生提醒大家,如果發覺自己出現尿頻、體重突然下降、全身乏力等症狀,一定要盡快求醫。

圖:網絡圖片