想創業成功?做好市場調查、了解買家需求等功課一定唔少得,印度教育玩具書公司創辦人、29歲嘅Dhvanil Sheth就係其中一個好例子,佢創業前用咗半年去調查市場情況,發現市場集教育、益智於一身嘅實體圖書同學習遊戲有好大需求,於是成立公司專賣呢類產品,果然生意好到飛起,預計今年收入有超過150萬美元(約1177萬港元)。

Dhvanil响2016年創業嗰陣,起步資金係5萬美元(約39萬港元)。有生意頭腦嘅佢,勝在市場觸覺敏銳,又做足功課,當知道好多家長都唔願意仔女成日接觸電子產品,就捕捉到創新產品嘅龐大商機。佢嘅公司參考網上同應用程式遊戲,設計出包含唔同種類、程度遊戲嘅產品,等小朋友可以透過遊戲學習語言、科學、邏輯思維等知識,推出無耐就大受歡迎,銷量响網購平台排第一!

其實唔單止立足印度市場,Dhvanil目標遠大,將產品遠銷至全球15個國家同地區,約3000間零售店都有得賣。今年初Dhvanil公司從投資公司Sequoia India獲得200萬美元(約1596萬港元)注資以拓展業務,希望長遠收入可以增加10倍。身為40人團隊嘅領袖,Dhvanil認為創業最緊要係勇氣同堅持,唔係所有嘢都會一帆風順,再好嘅公司都會有破產危機。佢亦覺得身為好嘅領袖,要謙虛、願意傾聽同學習,所以無工商管理碩士學位Dhvanil經常睇商業類書籍,上網睇領袖講座影片,希望增長商業知識,吸收其他人嘅成功經驗。

圖:Skillmatics