吸煙危害健康,但坊間仲有人認為食電子煙會無事,咁諗就大錯特錯喇!美國18歲大學生Chance Ammirata都以為食電子煙對健康無咩影響,點知日前胸腔突然劇痛,送院後先知自己個肺穿窿塌陷,差點無命!

之前Chance吸咗電子煙約一年半,平均每兩日就吸完一個煙彈。佢以為自己可以一路享受呢種「健康地食煙」嘅生活,但有次同朋友打保齡球,打打吓胸腔勁痛,當時仲以為只係拉傷咗肌肉,直至醫生檢查完,Chance先發現自己肺部已經穿窿同塌陷,仲有好多黑點,須要做手術修補,最終Chance大步檻過,執返條命仔。

依家Chance身體恢復得幾好,但以後可能無得再玩潛水等戶外活動,佢以過來人身份响社交媒體貼文,呼籲其他巴絲打唔好信電子煙無害,仲講明要同電子煙割席,「希望我嘅案例能讓社會大眾引以為戒」。

圖:Twitter@Chance Ammirata