世界各地有唔少設計好吸睛嘅書店,如荷蘭天堂書店、意大利布克書店等,吸引好多文青打卡。重慶都有一間空間設計極具特色嘅書店「鍾書閣」,裝潢融入山脈、土地元素,打造出好似被山包圍嘅閱讀空間,置身其中真係魔幻感十足~

書店設計靈感源自重慶嘅別稱「山城」,書架好似山入面嘅「藏書洞」,書房就係一個個有枱櫈嘅「山窿」,讀者想睇書就要「行山」攞書,再捐入「山窿」慢慢歎,私隱度幾高。就算唔入書房,寬闊嘅樓梯同通道都適合打書釘。書店仲有鏡面天花,映出山形樓梯、書架,恍如一個魔幻空間,至啱打卡!

店內空間使用大量深色木質材料,加上柔和燈光,令人感覺好舒服,可以專心遨遊書中世界。負責設計嘅公司表示,希望讀者身處書店可以投入閱讀同思想之中,洗滌心靈,發掘更多智慧。

圖:X+Living