患腦退化症嘅長者記性唔多好,佢哋獨自出街嘅話好大機會蕩失路,甚至發生意外。台灣台南市警察局新營分局製作印有「護老」二字嘅反光貼紙同反光板,並貼同掛响轄區內腦退化症患者嘅單車上,等民眾一發現呢啲老人家,可以按需要提供協助,減低老人家走失或發生意外嘅機會。

根據當局資料,最近5年一共接到32單腦退化症患者走失報案,其中有4人涉及兩次以上報案,更有2人發生意外死亡。為咗保障呢啲老人家安全,加上佢哋出門多以單車代步,於是警方諗到將反光板掛响老人家單車上,反光貼紙就貼响單車當眼處同老人家對鞋度,並要求警員一發現呢啲老人家都要即刻上前詢問情況。由於反光貼紙同反光板响夜間都好顯眼,警方都希望民眾夜晚見到呢啲老人家獨自出街,可以上前關心,問吓需唔需要幫手。估唔到用小小嘅反光貼紙同反光板,就可以守護到一班患有腦退化症嘅老人,當局嘅做法認真貼心~

圖:中時電子報