講起「網紅」,好多人都覺得係女神、小鮮肉,咁你又估唔估到一隻外表唔多好睇嘅無毛兔都可以做網紅?澳洲有一隻罕見嘅無毛兔Mr Bigglesworth,原本被認為頂籠得三個月命,好彩被任職設計師嘅主人Cassandra Hall收養照顧後,身體越嚟越健康,依家唔只超過兩歲,仲成為IG有超過七萬追蹤者嘅網紅。

無毛兔係基因有缺憾嘅兔仔品種,Mr Bigglesworth一出世就全身幾乎光禿禿,只有嘴部周圍同條尾有少少白毛,皮膚呈粉紅色,外表並唔討好,因此無人肯收養佢,直至遇到Cassandra。雖然Cassandra養過兔仔,但要照顧初初得兩個月大同身體唔好嘅無毛兔,都要做足功課。Cassandra之後幫Mr Bigglesworth開咗個IG帳戶,分享照顧無毛兔嘅生活,吸引大批網友追蹤,令Mr Bigglesworth華麗轉身成萬人迷。

响主人悉心照顧下,Mr Bigglesworth身體變得健康,皮膚亦靚咗,上個月仲過埋兩歲生日添~依家Mr Bigglesworth食得、玩得、瞓得,主人好開心咁表示,成家人都好鍾意呢隻無毛兔,話領養Mr Bigglesworth令一家感到幸福快樂。

圖:Facebook@Mr Bigglesworth & Friends