發生大火、地震等災難時,除咗救援人員到場處理之外,搜救犬亦幫咗好大忙,一樣值得尊重。最近墨西哥海軍搜救犬Frida完成十年救援使命,當局為佢舉行盛大退休儀式,感謝呢隻英雄犬嘅英勇付出。

Frida係一隻拉布拉多尋回犬,服役期間參加過2010年海地地震、2015年危地馬拉山崩等多次大型災難搜救行動,曾經被墨西哥總統大讚。講到Frida最威水嘅一次行動,就係佢曾經响災難現場搜索到超過50人,事後獲政府豎立銅像表揚,成為人人都識嘅英雄犬。

不過再犀利嘅搜救犬都會有變老嘅一日,今年十歲嘅Frida終於要退休喇。退休儀式上,訓練員同Frida除低搜救裝備,並送上狗玩具,祝福Frida之後快快樂樂生活,場面溫馨感動。Frida退休之後,獲當局安排住响海軍部門居住,繼續由自己嘅訓練員照顧。

圖:Secretaría de Marina Armada de México