大家有無計過自己每日玩幾耐手機呢?如果你係「低頭族」成員,機不離手玩餐懵,咁樣要留意喇。事關近日外國有研究指出,每日玩手機時間越長,肥胖機會就越高,甚至會增加患上其他致命疾病風險!

研究由哥倫比亞心肺血管專家Mirary Mantilla-Morrón負責,並提交到美國心臟病學會會議發表。研究以360位平均年齡20歲嘅男性,同埋700位平均年齡為19歲嘅女性為調查對象,收集佢哋嘅體重資料同用手機嘅時間。男性過重同肥胖嘅分別有36.1%同42.6%,女性過重同肥胖嘅就分別有63.9%同57.4%。研究發現,呢批過重同肥胖嘅人士之中,分別有26%同4.6%每日玩手機超過5個鐘,同時有少運動、多食快餐、多飲汽水等唔健康嘅生活習慣。

專家指,沉迷玩手機自然就導致較多時間坐定定,少咗做運動,咁樣好難唔肥,如果每日玩5個鐘或以上,致肥機會率最多增加43%。而身體少郁動,患心臟病、糖尿病、各類癌症等風險亦會增加,分分鐘引致早死。所以話,為咗健康,玩手機記得適可而止~

圖:網絡圖片