世上只有媽媽好?其實唔單止媽媽,爸爸對於仔女嘅愛護一樣值得歌頌。台灣一位60歲嘅黃爸爸唔忍心患腎病嘅阿女承受洗腎痛苦,於是捐出自己個腎,救返「前世情人」,彰顯偉大父愛。

黃爸爸個女今年32歲,患咗腎臟功能萎縮,每個禮拜要洗腎三日,過程痛苦之餘亦令身體越嚟越差。醫生表示,洗腎病人之中,有近一半會响五年後過身,但如果病人接受腎臟移植,手術後生存超過五年嘅機會率有90%以上。黃爸爸為咗幫阿女擺脫痛苦同延續生命,決定捐出腎臟,而大約四個鐘嘅移植手術好成功,父女平安,佢哋出院後健康亦都穩定。

之後兩父女返醫院多謝一班醫護人員,期間阿女含住感動嘅淚水,向爸爸送上一紮玫瑰,仲話好多謝爸爸,「就算係親人,也未必個個人都願意做」,一番話令所有人非常感動。收到阿女心意嘅黃爸爸就好謙虛話,每一個家庭遇到呢種事,做長輩嘅應該都會同佢一樣咁做。

圖:YouTube@彰化人彰化事