唔知大家平時飲唔晒嘅樽裝飲品會點處理呢?擺落雪櫃定就咁留返喺度聽日再飲過?小心喇,開封飲品一旦處理得唔好,分分鐘會導致食物中毒!因為飲品放過夜會滋生大量細菌,有電視節目仲指出,隔夜飲品嘅細菌量甚至勁過馬桶400倍,好得人驚呀~

日本有節目做實驗,將6種常見樽裝飲品(水、綠茶、麥茶、可樂、橙汁、牛奶咖啡)開封,各飲一啖之後,擺喺室溫28℃、濕度70%嘅環境3個鐘之後,再取樣做24小時細菌檢測。結果發現,5隻飲品樣本嘅細菌含量都有增幅,其中以牛奶咖啡最誇張,細菌含量由最初嘅600個激增至517萬個,嚇死小編!專家解釋話,飲品入面含有嘅糖同蛋白質越多,就會提供越多嘅養分俾細菌繁殖。

 唔想飲咁多細菌落肚變食物中毒?咁就記得要將開封咗嘅飲品擺落雪櫃貯藏,或者將飲品倒落個杯度飲,減少皮膚接觸飲品,咁就可以避免細菌滋生喇。

圖:《月曜 から夜ふかし》

#健康圈 #開封飲品 #食物中毒