唔同牌子嘅糖果大家食唔少,其實有好多「本地薑」一樣好出色,好似香港老字號「史蜜夫糖果」咁,佢哋嘅三大王牌──橙花軟糖、鳥結糖同椰絲棉花糖好受歡迎,仲係兩三代人嘅賀年糖果回憶,只可惜以後未必食得到喇,因為史蜜夫近日宣布即將結束業務,糖果廠會於短期內停產。

史蜜夫响香港設廠已經接近60年,憑住橙花軟糖、鳥結糖等打響名堂,而全人手包裝亦係一大特色。現時糖果廠由方氏三兄弟經營,因為三兄弟都超過60歲,日日落手落腳打理業務並唔容易。負責造糖工序嘅三弟表示,三兄弟同大部分員工年紀都唔細喇,加上依家好多人因為注重健康而少咗買糖食,佢覺得糖果廠係時候結業。三兄弟決定出售「史蜜夫糖果」品牌同商標,根據報道,目前有兩名買家同佢哋洽談緊。其實小編嘅爸爸對隻糖有唔少特別回憶,希望以後仲有機會食得返。

圖:znheshop