人腦植入晶片、用人腦操控電腦等等諗頭,一直被認為係電影情節或者科學狂想,不過未來居然有機會成真?呢種科技由美國電動車生產商Tesla創辦人馬斯克旗下嘅公司研發,唔單止可以幫助癱瘓者操控手機同電腦,創造出人腦同機器crossover嘅介面,甚至未來有望令人類同AI共生?

其實馬斯克一向計仔多多,諗法天馬行空,佢旗下嘅神經科技公司Neuralink日前發表最新技術,利用機械人响人類腦部鑽開幾個窿仔,植入指甲大細嘅晶片,當中嘅傳導絲線非常幼細,甚至幼過頭髮。之後耳仔後面會安裝處理器,用嚟接收晶片發送嘅訊息,仲負責用藍牙接駁手機同電腦,等用家可以靠腦力操控電子器材。

相關技術已經進行動物試驗,馬斯克話,目標係令人腦植入晶片嘅手術可以好似對眼做鐳射手術咁簡單,佢仲希望明年底前幫一個病患安裝呢種設備添。

圖:The Verge