7歲小朋友可以做啲咩?小編記得當年自己仲成嚿怕醜薯仔咁,咩都唔識,相比之下,美國小朋友Ryan Hickman就犀利喇!身為「環保小王子」嘅佢,細細個已經熟悉垃圾分類,仲運用呢方面知識成立公司,自己做CEO搵真銀,並將部分收益捐助海洋動物救護工作,真係又環保又有愛心!

Ryan早於3歲時已經好鍾意整理物品,學識垃圾分類後就愛上呢項工作,成日响屋企做垃圾分類,仲幫埋鄰居手。Ryan除咗一啲重嘢要爸爸幫手拎,其他物品都親自郁手整理,每次做都好開心。Ryan嘅舉動被廣傳,吸引其他人加入佢嘅行列,於是爸爸索性幫Ryan成立專做廢品回收嘅公司。

公司業務主要係收集廢品,經處理後賣畀回收場,目前共賣出約值9萬港幣嘅廢品。Ryan無急住攞呢啲錢去吃喝玩樂,而係捐畀慈善機構、買架大型垃圾車拓展業務,同埋儲起部分錢做學費。佢亦响公司網站賣自家文化T-shirt,將全部收益捐畀海洋動物救護中心,希望藉此喚起大眾對海洋環境保護嘅關注。Ryan亦因此被海洋動物中心請做形象大使,仲獲得CNN頒獎嘉許!

Ryan細細個已經咁有成就,不過佢一啲都無驕傲,如常打理公司,仲會去海灘清理垃圾,保護環境。憑自己一雙手,7歲仔都可以拯救地球,改變未來!

圖:Instagram@ryans_recycling、Emojipedia