早前日本興起一陣養刺蝟熱潮,刺蝟主人拍下刺蝟生活短片,放上社交媒體同朋友分享。而呢陣刺蝟熱近期吹到嚟香港,唔少港人喺社交媒體上見到啲咁可愛刺蝟,就買咗刺蝟返屋企養。但好多人喺事前唔了解刺蝟習性,結果買返屋企之後,被刺蝟身上嘅刺整傷,加上主人唔可以抱刺蝟上手玩,所以最終選擇棄養。眼見咁多棄養情況,Kuri Café店主兼刺蝟主人就希望公眾了解多啲刺蝟特性,就開咗呢間Café,並希望透過刺蝟學習坊,認識更多刺蝟主人要肩負起嘅責任,仲希望大家唔好一時衝動而飼養。