「能力越大,責任越大」係蜘蛛俠嘅座右銘,佢响電影中鋤強扶弱,係好多巴絲打嘅偶像,但原來「蜘蛛俠」响現實都係一位暖男~最近《蜘蛛俠:決戰千里》主演湯姆‧賀倫(Tom Holland)去首爾宣傳新戲,期間到當地兒童醫院探訪病童,仲大派禮物,令一班小朋友好開心XD

呢次探訪係由湯姆賀倫主動提出,佢要求唔好洩漏行程、唔好安排傳媒採訪,希望保護小朋友私隱,同埋畀自己可以低調咁同小朋友玩,認真體貼!賀倫著住蜘蛛俠戲服現身醫院,無論小朋友、家長、醫護人員等都好surprise!「蜘蛛俠」一場嚟到,當然唔會隨便行吓就走,佢周圍同小朋友影相、簽名、傾偈,一啲架子都無,之後仲派禮物畀小朋友添~好有愛呀~

賀倫响醫院足足逗留咗個幾鐘,帶咗好多歡樂畀小朋友。有病童家長好感動咁話,賀倫並唔係超級英雄,而係一位天使至真!

圖:IG@plspe777、IG@love_snuh、IG@soo_hwan、Emojipedia