唔少人中意食肥牛,多數都係淥熟之後點醬料食,但其實肥牛燒嚟食都好好味㗎~深圳南山區有間叫「胡哥烤肥牛」嘅烤肉店,每日都有勁多人幫襯,為嘅就係招牌烤肥牛!唔單止牛肉,連生蠔、東北風味香腸同魷魚都係呢度嘅燒烤名物。

1. 肥牛

畀100蚊人民幣(約110港元)就買到一份,大大塊、肥瘦均勻嘅肉片放滿成隻碟,未燒就已經令人食指大動。燒嘅時候肉香撲鼻,落啲孜然粉可以令肉片更鮮嫩、更惹味。燒好之後點甜香嘅蒜醬食,或者配搭洋蔥再用生菜包住食,口感豐富之餘又唔會太肥膩。

2. 生蠔

燒烤無生蠔硬係好似少咁啲嘢咁~放心,胡哥呢度都有生蠔食㗎,而且隻隻新鮮飽滿。燒嗰陣落一層蒜蓉提升味道,食嗰陣連汁一啖食曬,正到飛起!

3. 香腸

心急朋友最愛,因為呢款香腸好快熟。燒完之後脹卜卜,食落啖啖肉,真係會停唔到口。

4. 魷魚

口感彈牙,但味道偏鹹,啱曬重口味嘅朋友。

小編個胃已經被四款美食搞到蠢蠢欲動,睇嚟又要約friend北上歎美食喇~

圖:大眾點評、深圳美食街圈