異地戀通常唔被睇好,主要因為雙方聚少離多,感情容易變淡,不過有好多嘢事在人為嘅啫~台灣有位女網友响討論區分享咗同日本男友維繫感情嘅方法,就係每星期約定食同一款食物並影相,再將兩張相砌成一張新相,作為拍拖特定節目。

女網友叫呢啲相做「每周一食相」,每張都由左(日本)右(台灣)兩張相組成,分別影咗食物嘅一半部分,再合二為一。譬如有個星期食鯛魚燒,左邊係個魚頭,右邊係條魚尾,砌埋就係完整嘅鯛魚燒。呢對情侶仲「合製」咗冬甩、雪條、啤酒等食物飲品。

咁呢啲創意十足嘅相又係點整嘅呢?女網友表示可以由對方先影相,自己再因應張相調整角度,影出配對嘅相,建議彼此影多幾張以揀出最襯嘅。影完相後用Snapseed手機app調校色調,睇落順眼就得,再以Line Camera手機app砌相,最後用Snapseed執靚佢。

其他網友睇完之後都話啲相「好有愛」,有人覺得咁樣做能為一段關係增添樂趣。各位Long D緊嘅巴絲打不妨參考學吓~

圖:Dcard、Emojipedia