敦煌唔單止係絲綢之路重鎮之一,仲展現出燦爛嘅中國文化。如果有機會去敦煌,仲可以去著名藝術寶庫莫高窟實習,同一班專家學者學習文化保育知識,兼且可以為遊客講解,你又想唔想去?香港16位大專院校學生搶先一步,參加青年廣場「香港青年敦煌實習計劃2019」,去到敦煌同莫高窟嚟個親密接觸~

「香港青年敦煌實習計劃」由民政事務局及青年廣場於2018年起主辦,今年 16位嚟自香港大學、香港中文大學、香港浸會大學、嶺南大學、香港教育大學、香港樹仁大學同埋香港城市大學專上學院嘅學生去到當地,展開六星期實習。

實習計劃涵蓋敦煌人文地理、專題學習、講解訓練同實習等內容,非常豐富。學員除咗可以從歷史、藝術、民俗、科學等多角度深入認識敦煌,亦會去實地考察,好似雅丹國家地質公園、漢長城遺址、玉門關、榆林窟,以及鎖陽城等,全面探索敦煌文化。實習期間,學員仲有機會走入敦煌莫高窟,响千年石窟內為遊客講解,真正做到學以致用。

學員代表陳雪兒話,希望一班學員唔單止可以了解當地文化,亦可以作為歷史嘅傳承者,盡力同更多人訴說敦煌故事。